आदिवासी ठाकूर समाजातील कुटुंबांना मोठा दिलासा मिळणार
पनवेल (प्रतिनिधी) आदिवासी समाजातील कुटुंबांना त्यांच्या हक्काचे घर मिळावे यासाठी शासनाच्या माध्यमातून प्रयत्न सुरु आहेत. आदिवासी समाजाकरिता घरकुलांसाठी जागा व जातीचे दाखले उपलब्ध करून देण्याच्या अनुषंगाने उरण विधानसभा मतदार संघाचे आमदार महेश बालदी यांच्या अध्यक्षतेखाली आणि प्रांताधिकारी राहुल मुंडके यांच्या प्रमुख उपस्थितीत आज पनवेल उपविभागीय अधिकारी कार्यालयात बैठक पार पडली. या बैठकीस पनवेल पंचायत समिती गटविकास अधिकारी संजय भोये, खालापूर गट विकास अधिकारी बालाजी पुरी, उरण गटविकास अधिकारी समीर वाठारकर यांच्यासह वन विभागाचे अधिकारी, भाजपचे खालापूर तालुकाध्यक्ष रामदास ठोंबरे, माजी जिल्हा परिषद सदस्य ज्ञानेश्वर घरत, बोरगावचे सरपंच प्रितेश मोरे, चौक ग्रामपंचायतीचे माजी उपसरपंच गणेश कदम, कर्नाळा ग्रामपंचायतीचे माजी उपसरपंच विद्याधर जोशी, सामाजिक कार्यकर्ते रत्नाकर घरत, घेरावाडीचे ग्रामस्थ आदी उपस्थित होते.
आदिवासी ठाकूर समाजाकरिता शासनाच्या विविध योजनेंतर्गत घरकुल मिळणेकामी आवश्यक असणारा जातीचा दाखला हा अनेक लाभार्थ्याकडे नसल्याने घरकुल मंजूर होण्यासाठी अडचणी येत असतात. याबाबत प्रांताधिकारी यांच्याशी चर्चा करून योग्य लाभार्थ्याला कशा पद्धतीने दाखला उपलब्ध करता येईल या दृष्टिकोनातून सदर बैठकीमध्ये चर्चा झाली. ठाकूर वाडीमध्ये शासनाचे प्रतिनिधी पाठवून लाभार्थ्यांची कागदपत्रे तपासताना त्यातील त्रुटी दूर करण्यासाठी प्रयत्न व्हावेत जेणे करून जास्तीत जास्त बांधवाना घरकुल योजनेचा लाभ मिळेल.
Tags
पनवेल