पनवेल दि.२२ (संजय कदम) तालुका हद्दीतील महामार्ग पोलीस केंद्र पळस्पे जवळ एका एसटी बसचा अपघात झाल्याने यात आठ ते दहा प्रवासी किरकोळ जखमी झाल्याची झाली आहे.
पनवेल तालुका हद्दीतील महामार्ग पोलीस केंद्र, पळस्पे चौकीजवळ महाराष्ट्र राज्य परिवहन महामंडळाची ठाणे - सांगली बस क्रमांक MH 40 N 9164 हिला गंभीर अपघात होऊन प्रवास्यांनी खच्चून भरलेली बस रस्त्याच्या बाजूला पलटी झाली. कोन पुलावरून महामार्गावर जाणारा वळण घेत असताना चालकाचे बसवरील नियंत्रण सुटले आणि बस रस्त्यावरून खाली झाडांमध्ये पलटी झाली.
ही बस प्रवाश्यांनी खच्चून भरली होती.दिवाळी सणासाठी चाकरमानी मुंबईहून गावी जाण्यासाठी या बसमधून प्रवास करीत होते. या बसमधून तब्बल ४६ प्रवासी प्रवास करीत होते. अपघातानंतर सर्व प्रवासी बसमध्येच अडकून पडले होते. महामार्ग पोलीस केंद्राला घटनेची माहिती मिळताच त्यांनी तात्काळ घटनास्थळी धाव घेतली. बसच्या पाठीमागील काचा फोडून प्रवासी तसेच त्यांचे सामान बाहेर काढण्यात आले. या अपघातात ८ ते १० प्रवासी जखमी झाले आहेत तसेच बस चालकदेखील गंभीर जखमी असून त्याच्या चेहऱ्याला दुखापत झाली आहे.
जखमी प्रवाश्यांना उपचारासाठी आयआरबीच्या रुग्णवाहिकेतून एमजीएम, कळंबोलीतील दवाखान्यात दाखल करण्यात आलंय. महामार्ग पोलीसांनी तात्काळ मदत करीत सर्व प्रवाश्यांना त्यांच्या सामानासह सुखरूप बाहेर काढले. भांबावलेल्या प्रवाश्यांना आधार देण्याचं मोलाचं कार्य महामार्ग पोलिसांनी केलं. प्रवाश्यांना पिण्याच्या पाण्याची व्यवस्था करून त्यांना पर्यायी वाहनांची देखील व्यवस्था करून देण्यात आली. त्यामुळे प्रवाशांनी महामार्ग पोलीसांचे विशेष आभार मानले.
