पनवेल दि.२६ (वार्ताहर) : नवीन पनवेल सेक्टर- १८ भागात नोव्हेंबरमध्ये घडलेल्या हत्याप्रकरणातील आरोपी पप्पू उर्फ शफीक उल अहमद हा बांगलादेशीमधून दीड वर्षांपूर्वी घुसखोरी करून भारतात आल्याचे तसेच तो गुजरात आणि पनवेल भागात बेकायदा राहत असल्याचे तपासात आढळून आले आहे. त्याने गुजरातमध्ये असताना, भारतातील नागरिकांचे ओळखपत्र असलेले आधारकार्डसुद्धा तयार करून घेतल्याचे तपासात आढळून आले आहे. त्यामुळे खांदेश्वर पोलिसांनी त्याच्यावर गुन्हा दाखल केला आहे. आरोपी सध्या हत्या प्रकरणात न्यायालयीन कोठडीत आहे.
आरोपी पप्पू उर्फ शफीक (२५) याचे नोव्हेंबरमध्ये नवीन पनवेलमधील पोदी नं. २ भागात राहणाऱ्या एका विवाहित महिलेसोबत प्रेमसंबंध जुळले होते. मात्र तिचा पती या संबंधांमध्ये अडथळा ठरत होता. त्यामुळे आरोपी पप्पू याने पश्चिम बंगालमधून दोन साथीदारांना बोलावून तिच्या पतीची गळा चिरून हत्या केली होती. त्यानंतर खांदेश्वर पोलिस आणि गुन्हे शाखेने या हत्याप्रकरणाचा छडा लावून तिन्ही आरोपींना अटक केली होती. तेव्हापासून हे आरोपी न्यायालयीन कोठडीत असून खांदेश्वर पोलिसांनी हत्येचा तपास पूर्ण करून न्यायालयात दोषारोपपत्र दाखल केले आहे.
Tags
पनवेल