पनवेल (4K News) लोकप्रिय आमदार प्रशांत ठाकूर यांच्या वाढदिवसाचे औचित्य साधून नादब्रम्ह साधना मंडळ खारघर व पनवेल तालुका सांस्कृतिक सेल यांच्या संयुक्त विद्यमाने सोमवार दिनांक ५ ऑगस्ट रोजी शास्त्रीय व उपशास्त्रीय गायन संगीतची सुश्राव्य मैफिल अर्थात 'भजन स्वरपुष्प' कार्यक्रमाचे आयोजन करण्यात आले आहे.
पनवेल शहरातील मार्केट यार्ड मधील श्री. रामशेठ ठाकूर सामाजिक विकास मंडळाच्या सभागृहात सोमवारी सायंकाळी ०५ वाजता होणाऱ्या या कार्यक्रमासाठी प्रमुख मान्यवर म्हणून माजी खासदार लोकनेते रामशेठ ठाकूर, आमदार प्रशांत ठाकूर, पनवेल महानगरपालिकेचे माजी सभागृहनेते परेश ठाकूर, भाजपचे उत्तर रायगड जिल्हाध्यक्ष अविनाश कोळी, तालुकाध्यक्ष अरुणशेठ भगत, भजनरत्न महादेवबुवा शहाबाजकर, सांस्कृतिक सेलचे जिल्हाध्यक्ष अभिषेक पटवर्धन, सुरेश खडके, ह. भ. प. नंदकुमार कर्वे आदी उपस्थित असणार आहेत.
यावेळी भजन स्वरपुष्प कार्यक्रमात छत्रपती संभाजी नगर येथील गायक ओम बोंगाणे यांचे शास्त्रीय व उपशास्त्रीय गायन होणार आहे. त्यांना तबल्यावर विनायक नाईक, हार्मोनियमवर मंदार दिक्षित व पखवाजवर सूरज गोंधळी यांची साथ असणार आहे. त्यानंतर रायगड भूषण पंडित उमेश चौधरी यांच्या गायनाने समारोप होणार आहे. त्यांना वसंतशेठ पाटील, कृष्णा पवार, नारायणबुवा पाटील, मोतीराम कडू, जगदिश म्हात्रे व नादब्रम्ह साधना मंडळ शिष्य परिवाराची साथसंगत तर तबल्यावर कौस्तुभ भाग्यवंत यांची साथ असणार आहे. या कार्यक्रमाचा रसिकांनी लाभ घ्यावा, असे आवाहन कार्यक्रमाचे संयोजक अक्षय चौधरी यांनी केले आहे.
Tags
पनवेल.