पनवेल दि.०५ (वार्ताहर) : रात्रीच्या वेळी दुचाकीवर जाणाऱ्या महिलेला तीन चोरट्यांनी लुटण्यासाठी हल्ला केला. या हल्ल्याचा धडाडीने प्रतिकार करीत महिलेने चोरट्यांना पळवून लावले. मध्यरात्री या मार्गावरून जाणाऱ्या नागरिकांनी त्या जखमी रणरागिणीला मदतीचा हात दिला
मात्र तिने प्रतिकाराचे धाडसच केले नसते तर सोन्याच्या मंगळसूत्रासह तिचे प्राण धोक्यात आले असते. तळोजा औद्योगिक वसाहतीमधील अग्निशमन दलाच्या केंद्रासमोरील मार्गावर ही घटना घडली आहे.या धाडसी महिलेचे नाव प्रियंका बागल-गुंड असे आहे.
सध्या या महिलेच्या खांद्याला व गुडघ्याला मार लागला असून तिची प्रकृती बरी आहे. २६ वर्षीय प्रियंका हिच्या नातेवाईक महिलेला कळंबोली येथील एमजीएम रुग्णालयात त्याच रात्री साडेअकरा वाजता बाळ झाल्याने त्या रुग्णालयात माता व बालकाची खबर घेऊन घरी जात असताना ही घटना घडली.
प्रियंका तळोजातील एका कारखान्यांत रासायनिक प्रयोगशाळा विभागात काम करतात. प्रियंका रुग्णालयातून निघाल्यानंतर त्यांनी पतीला फोन करून त्या दुचाकीवरून घरी येत असल्याची माहिती दिली. दुचाकी चालविणाऱ्या प्रियंका हिचा पाठलाग एका दुचाकीवरून एक अनोळखी त्रिकुट करत होते. त्यांनी तळोजा औद्योगिक वसाहतीमधील अंधाराचा फायदा उचलत प्रियंका यांच्यावर धावत्या दुचाकीवर हल्ला केला.
चोरट्याने प्रियंका यांचा मोबाइल हिसकावण्याचा प्रयत्न सुरुवातीला केला. मात्र प्रियंका या दुचाकीचा वेग कमी करत नसल्याचे पाहून चोरट्याने त्यांच्या गळ्यातील मंगळसूत्रावर हात मारला. तीन चोरटे व एकट्या प्रियंका यांची दुचाकींवर सुरू असलेल्या झटापटीचा हा सर्व थरार तळोजातील रस्त्यावर सुरू होता. प्रियंका यांनी एका हाताने दुचाकी चालवली तर दुसऱ्या हाताने चोरट्यांच्या हल्ल्याला धावत्या दुचाकीवरुन प्रतिकार केला.
यामध्ये त्या दुचाकीवरून खाली कोसळल्या आणि त्यांनी चोरट्यांनाच आव्हान देत त्या किंचाळल्या. प्रियंका यांची ही कल्काचाळी त्या रस्त्यावर जाणाऱ्या इतर प्रवाशांनी ऐकून तेथे धाव घेतली. प्रियंका यांचे हे दुर्गेचे रुप पाहून चोरटेही पसार झाले. एक तीन आसनी रिक्षाचालकांसह तेथे दीपक फर्टिलायझर कंपनीचे तोंडगे गावातील ठेकेदार महेश पाटील हे आले. रिक्षाचालकाने रस्त्यावर पडलेल्या प्रियंका यांना पदपथावर बसवले. त्यानंतर महेश पाटील यांनी दीपक फर्टिलायझर कंपनीच्या डॉक्टरांना तेथे आणून प्रियंका यांना डॉक्टरांनी प्रथमोपचार दिले.
