4K News & Entertainment

 कर्जाच्या बहाण्याने फसवणूक पनवेल दि १८ (वार्ताहर):  बजाज फायनान्स कंपनीकडून ७ लाख रुपयांचे कर्ज मिळवून देण्याच्या बहाण्याने एका टोळीने कळंबोलीत राहणाऱ्या व्यक्तीला ७० हजार रुपये भरण्यास भाग पाडून त्यांची फसवणूक केल्याची घटना उघडकीस आली आहे. कळंबोली पोलिसांनी या प्रकरणी सायबर चोरट्यांच्या टोळी विरोधात गुन्हा दाखल केला आहे          सदर प्रकरणातील तक्रारदार संजयकुमार जाधव (५८) कळंबोलीतील रोडपाली भागात राहण्यास असून, प्रियम झा नावाच्या व्यक्तीने गोरेगाव येथील बजाज फायनान्स कार्यालयातून बोलत असल्याचे भासवून जाधव यांच्याशी संपर्क साधला होता.

 त्यावेळी प्रियम झा याने कर्ज मिळवून देण्याचा बहाणा करुन त्यांच्याकडून व्हॉटस्अॅप वरुन आधार कार्ड आणि पॅनकार्ड मागवून घेतले. त्यानंतर दुसऱ्या दिवशी प्रियम झा याने जाधव यांना संपर्क साधून इन्शुरन्स पॉलिसी गहाण ठेवून ७ लाख रुपये इतके कर्ज मंजूर होवु शकते, असे त्यांना सांगितले. तसेच पॉलिसी काढण्यासाठी कर्जाच्या १० टक्के प्रमाणे दोन टप्प्यात पैसे भरावे लागतील असे सांगितले. त्यानंतर जाधव यांनी त्याच दिवशी ३५ हजार रुपये प्रियम झा याने दिलेल्या फिनो बँकेच्या खात्यात गुगल- पे द्वारे पाठविले. त्यानंतर प्रियम झा याने कर्जाचे पैसे खात्यात जमा झाल्यानंतर दुसरा हप्ता भरण्यास सांगितले. त्यावेळी झा याने त्याच्या नावाचे बजाज फायनान्स कंपनीचे ओळखपत्र, कंपनी कार्यालयातील फोटो, पॅनकार्ड आणि बजाज फायनान्स कंपनीचे जाधव यांच्या नावाचे कर्ज मंजूर केलेले पत्र जाधव यांना पाठवून त्यांचा विश्वास संपादन केला.

 त्यानंतर बँकेचा व्हेरीफिकेशन कॉल असल्याचे भासवून त्याच टोळीतील दुसऱ्या ठकसेनाने जाधव यांना संपर्क साधून त्यांची माहिती विचारली. तसेच उर्वरित ३५ हजार रुपये भरल्याशिवाय पॉलिसी तयार होणार नसल्याचे आणि कर्जाची रक्कम त्यांच्या खात्यावर जमा होणार नसल्याचे सांगितले. त्यामुळे जाधव यांनी आणखी ३५ हजार रुपये प्रियम झा याच्या खात्यावर पाठवून दिल्यानंतर झा याने दोन दिवसात त्यांचे पैसे येतील असे सांगितले. मात्र, आजपर्यंत त्यांच्या खात्यात पैसे आले नाहीत. त्यामुळे जाधव यांनी बजाज फायनान्स कंपनीच्या कस्टमर केअरला संपर्क साधून चौकशी केल्यानंतर त्यांची फसवणूक झाल्याचे त्यांना सांगण्यात आले. त्यानंतर जाधव यांनी कळंबोली पोलीस ठाण्यात धाव घेऊन तक्रार दाखल केली.