पनवेल दि . २० ( वार्ताहर ) : नवीन पनवेल, सेक्टर-१८ भागात १७ नोव्हेंबर रोजी घडलेल्या हत्या प्रकरणाचा छडा लावण्यात खांदेश्वर पोलिसांना यश आले आहे. या हत्या प्रकरणात मृत ओमर फारुक फकीर अहमद ब्यापारी (२२) याची हत्या त्याच्याच पत्नीने आपल्या प्रियकराच्या मदतीने घडवून आणल्याचे तपासात उघडकीस आले आहे.
त्यानुसार पोलिसांनी या हत्या प्रकरणात मृत ओमरची पत्नी अस्मीरा खातून ब्यापारी (२४), तिचा बांग्लादेशी प्रियकर पप्पू उर्फ शफीक उल अहमद (२५) आणि त्याचे दोघे साथीदार अशा चार जणांना अटक केली आहे. न्यायालयाने सदर चौघांची पोलीस कोठडीत रवानगी केली आहे. सदर घटनेतील मृत ओमर फारुक मुळचा पश्चिम बंगाल मधील असून त्याची पत्नी अस्मीरा खातून हिचा पूर्वी जहांगिर मोंडल याच्यासोबत विवाह झाला होता. त्याच्यापासून तिला ७ वर्षाची मुलगी आहे. त्यानंतर अस्मीराने डिसेंबर २०२१ मध्ये पहिल्या पतीपासून घटस्फोट घेतल्यानंतर ओमरसोबत लग्न केले होते. त्यानंतर ते दोघे रोजगारासाठी नवीन पनवेल पोदी नं. २ मध्ये आले होते. सदर ठिकाणी ओमर मजुरी करुन पत्नी आणि मुलीसह रहात होता.
तर आरोपी पप्पू उर्फ शकील उल अहमद मुळचा बांग्लादेशी नागरिक असून तो देखील कामानिमित्त पनवेलमध्ये आला होता. त्याला राहण्यासाठी घर नसल्याने जुलै महिन्यामध्ये ओमरने त्याला आपल्या घरी काही दिवसासाठी आसरा दिला होता. यादरम्यान आरोपी पप्पू आणि ओमरच्या पत्नीमध्ये प्रेमसंबंध निर्माण होऊन त्यांच्यात अनैतिक संबंध सुरु झाले होते. त्यानंतर पप्पुने ओमरला कायमचे सोडून त्याच्यासोबत राहण्यास अस्मीराच्या पाठीमागे तगादा लावला होता. त्यामुळे अस्मीराने त्यांच्या प्रेमसंबंधात अडथळा ठरणारा पती ओमरचा कायमचा काटा काढल्यानंतर त्याच्यासोबत लग्न करणार असल्याचे सांगितले होते. त्यामुळे पप्पू याने ओमरची हत्या करण्यासाठी पश्चिम बंगाल येथून आपल्या दोन साथिदारांना बोलावून घेतले होते.
त्यानंतर या तिघांनी १७ नोव्हेंबर रोजी सायंकाळी ओमरला नवीन पनवेल, सेक्टर-१८ मधील सिडको गार्डन जवळ गाठून त्याच्या गळ्यावर, मानेवर आणि तोंडावर धारदार हत्याराने वार करुन त्याची हत्या करुन पलायन केले होते. त्यावेळी ओमरच्या पत्नीने सदर हत्येच्या कटात सहभागी नसल्याचे दाखवत स्वतः खांदेश्वर पोलीस ठाण्यात तक्रार दिली होती. तसेच प्रियकर पप्पुने त्याला मारल्याचा संशय व्यक्त केला होता. खांदेश्वर पोलिसांसह गुन्हे शाखा युनिट-२ च्या पथकाने देखील या प्रकणाचा तपास सुरु केला होता. या तपासादरम्यान सदर हत्येच्या कटात ओमरची पत्नी अस्मीरा आणि तिचा प्रियकर पप्पू या दोघांचा सहभाग असल्याचे आढळून आल्यानंतर पोलिसांनी त्यांना ताब्यात घेतले. त्यानंतर पश्चिम बंगाल येथे पळून जाण्याच्या तयारी असलेल्या तरीकुल महेश मंडल (१९) आणि किताबुल अब्दुल वाहिद मंडल (२७) या दोन आरोपींना गुन्हे शाखेच्या पथकाने अटक केली.सदर कामगिरी युनिट - २चे वरिष्ठ पोलीस निरीक्षक रविंद्र पाटील यांच्या नेतृत्वाखाली सहाय्यक पोलीस निरीक्षक संदीप गायवाकवाड, प्रविण फडतरे, पोलीस उपनिरीक्षक वैभव रोंग्ये, मानसिंग पाटील, सुदाम पाटील आदिंच्या पथकाने केली.
