हिंदूसंघटन आणि हिंदु राष्ट्राच्या मागणीसाठी पनवेल येथे 12 फेब्रुवारीला हिंदु राष्ट्र-जागृती सभा

पनवेल दि.०८(वार्ताहर): भारताच्या संविधानातील समता, बंधुता आणि न्याय आदी मूलभूत तत्त्वांचे पालन बंधनकारक आहे. असे असतानाही अल्पसंख्याकांना धर्माच्या आधारावर विशेष सोयीसुविधा देऊन देशातील बहुसंख्य हिंदूंना सातत्याने दुय्यम वागणूक दिली जात आहे. सध्या हिंदूंच्या हजारो युवतींना उद्ध्वस्त करणारा'लव्ह जिहाद', भारतीय अर्थव्यवस्थेवरील नवे संकट 'हलाल जिहाद', 'लॅण्ड जिहाद', धर्मांतर, देवतांचे विडंबन, मंदिराचे सरकारीकरण आदी माध्यमातून सेक्युलर भारतात हिंदूंवर निरनिराळे आघात होत आहेत.

 अशा अनेक आघातांविरोधात वाचा फोडण्यासाठी, हिंदूसंघटन तसेच प्रत्येकाचा विचार करणाऱ्या आदर्श अशा हिंदु राष्ट्राचा आवाज बुलंद करण्यासाठी हिंदु जनजागृती समिती आणि समस्त हिंदुत्वनिष्ठ संघटनांच्या वतीने 12 फेब्रुवारीला 'दि मिडल क्लास को ऑप. हाऊसिंग सोसायटी'चे मैदान, पनवेल येथे सायंकाळी 5 वाजता हिंदु राष्ट्र-जागृती सभेचे आयोजन करण्यात आले आहे, अशी माहिती हिंदु जनजागृती समितीचे मुंबई, ठाणे, रायगड आणि पालघर जिल्हा समन्वयक सागर चोपदार यांनी दिली. पनवेल येथे आयोजित करण्यात आलेल्या पत्रकार परिषदेत ते बोलत होते. या वेळी हिंदु जनजागृती समितीच्या रणरागिणी शाखेच्या डॉ. दीक्षा पेंडभाजे उपस्थित होत्या.

          हिंदु जनजागृती समितीचे सागर चोपदार पुढे म्हणाले, 'पनवेलसह रायगडमधील विविध भागात मोठ्या प्रमाणात हिंदू बांधवांचे धर्मांतर होत आहे. छत्रपती शिवाजी महाराजांच्या हिंदवी स्वराज्याचा वारसा लाभलेल्या आपल्या जिल्ह्यातील रायगड, कुलाबा आदी गड-दुर्गांवर इस्लामी अतिक्रमणे करुन एकप्रकारचा लॅण्ड जिहाद सुरु आहे. 'लॅण्ड जिहाद' यांसारखे हिंदूंवरील विविध आघात रोखण्यासह हिंदूंना पुन्हा एकदा सन्मानाने जगण्यासाठी हिंदु राष्ट्र' स्थापण्याची आवश्यकता असून या हिंदु राष्ट्र जागृती सभांच्या माध्यमातून हिंदू जनजागृती समितीच्या वतीने देशभर जनजागृती केली जात आहे. पनवेल पंचक्रोशीसह रायगड जिल्ह्यातील विविध भागांत या सभेचा मोठ्या प्रमाणात प्रचार करण्यात आला असून समस्त हिंदुत्वनिष्ठांनी ही सभा यशस्वी करण्याचा निर्धार केला आहे. 

हिंदु जनजागृती समिती आणि विविध हिंदुत्वनिष्ठ संघटना यांचे कार्यकर्ते पनवेलमधील विविध भागात बैठका, व्याख्याने, हस्तपत्रके, भित्तीपत्रके, फ्लेक्स फलक या माध्यमांतून प्रसार करत आहेत तसेच व्हाटस्एप, ट्विटर, फेसबुक या सोशल मिडियाच्या माध्यमांतूनही मोठ्या प्रमाणात या सभेचा प्रसार करण्यात आला असून लोकांचा उत्स्फूर्त प्रतिसाद याला लाभत आहे. या हिंदु राष्ट्र-जागृती सभेचा प्रचार अंतिम टप्प्यात आला असून जनजागृतीसाठी 10 फेब्रुवारीला पनवेल मध्ये भव्य वाहनफेरीचे आयोजन करण्यात आले आहे. पनवेल येथे होणाऱ्या हिंदु राष्ट्र-जागृती सभेचे थेट प्रक्षेपण फेसबुकवर http://fb.com/JagoHinduRaigad या link द्वारे पाहता येणार आहे. या सभेत विविध मान्यवर वक्ते मार्गदर्शन करणार असून या ठिकाणी क्रांतिकारकांविषयी माहिती देणारे आणि हिंदूंना प्रतिदिन करावयाच्या धर्माचरणाच्या कृती, साधना यांविषयी मार्गदर्शन. करणारे फलक प्रदर्शन तसेच हिंदूंना धर्मशिक्षण देणाऱ्या विविध ग्रंथांचे प्रदर्शनही लावण्यात येणार आहे. या सभेला समस्त हिंदूंनी जात-पात, संप्रदाय, संघटना, पक्ष आदी बिरुदावले बाजूला ठेवून एक 'हिंदु' म्हणून सभेला मोठ्या संख्येने उपस्थित रहावे, असे आवाहन समितीच्या वतीने करण्यात आले आहे. अधिक माहितीसाठी 8080208958 या क्रमांकावर संपर्क करावा, असे हिंदु जनजागृती समितीच्या वतीने काढण्यात आलेल्या प्रसिद्धी पत्रकात म्हटले आहे.