यावेळी जिल्हा सचिव अतुल चव्हाण, उपशहर प्रमुख संजय मुरकुटे, वाहतूक सेना पनवेलचे सचिन जाधव, रस्ते आस्थापना मनसे जिल्हा सरचिटणीस किरण गुरव उपस्थित होते. यावेळी राजभाषा महोत्सवाची माहिती देताना आयोजक योगेश बिले यांनी सांगितलं की, जुन्या पनवेलमधील विरुपक्ष हॉलजवळच्या पाण्याच्या टाकीच्या मैदानात 'दि. बा. पाटील पुस्तकनगरी साकारण्यात येत आहे. गुरुवार २३ फेब्रुवारी रोजी सकाळी १० वाजता मनसे नेते बाळा नांदगावकर यांच्या हस्ते राजभाषा महोत्सवाचे तसंच मराठी पुस्तक प्रदर्शनाचे उद्घाटन होणार असून सायंकाळी ६ वाजता 'मराठी नाटक आणि सिनेमा : भविष्यातील 'आव्हानं या चर्चासत्रात ख्यातनाम दिग्दर्शक केदार शिंदे, अभिजित पानसे, अभिनेता पुष्कर श्रोत्री, संतोष 'जुवेकर सहभागी होणार आहेत.
लेखक-पत्रकार नरेंद्र बंडवे आणि अजय परचुरे त्यांच्याशी संवाद साधणार आहेत. तसेच शुक्रवार २४ फेब्रुवारी रोजी सायंकाळी ६ वाजता 'न्यूजलेस कविता' हा काव्य वाचनाचा कार्यक्रम होणार असून त्यात पत्रकार- कवी पंकज दळवी, सुरेश ठमके, भिमराव गवळी, यामिनी दळवी, प्रशांत डिंगणकर, श्वेता सोपारकर, सुनील तांबे, दीपक पाळसुले, माधव डोळे सहभागी होणार आहेत. त्याचप्रमाणे शनिवार २५ फेब्रुवारी रोजी सायंकाळी इतिहास अभ्यासक श्रीनिवास पेंडसे यांचे 'धर्मवीर छत्रपती संभाजी महाराज जीवन चरित्र' यावर व्याख्यान होणार आहे, तर रविवार २६ फेब्रुवारी रोजी सायंकाळी ख्यातनाम मराठ लेखक अच्युत गोडबोले 'ज्ञानभाषा मराठी आणि माझा लेखन प्रवास' या विषयावर अनुभवकथन करताना राजभाषा मराठी नव्या युगाची ज्ञानभाषा होऊ शकेल का, याबाबत भाष्य करणार आहेत. सोमवारी २७ फेब्रुवारी रोजी सायंकाळी महाराष्ट्राची लोकधारा आणि प्रतिभावंतांचा सत्कार आयोजित केल्या माहिती राजभाषा महोत्सवाचे आयोजक, मनसेचे पनवेल शहराध्यक्ष योगेश चिले यांनी दिली.
Tags
पनवेल