पनवेल दि.१९ (वार्ताहर) : महाराष्ट्र राज्य पोलीस दल अधिक अलर्ट आणि सक्षम झालेले आहे. कायदा आणि सुव्यवस्थेबरोबरच गुन्हे प्रगटीकरण करून गुन्हेगारीला आळा बसवण्याचे प्रथम कर्तव्य खाकी वर्दीला बजावावे लागते. सखोल तपास, तांत्रिक दुवे तसेच माहिती आणि तंत्रज्ञानाचा वापर करून कशा पद्धतीने गुन्हे अन्वेषण करायचे याकरीता राज्यभरातील पोलिसांना गुन्हे अन्वेषण प्रशिक्षण विद्यालय नाशिक येथे दोन आठवड्यांचे प्रशिक्षण दिले जाते. नुकत्याच पार पडलेल्या या कार्यशाळेमध्ये नवी मुंबई पोलिसांनी छाप पाडली. या निमित्ताने घेण्यात आलेल्या लेखी परीक्षेत पहिले तीनही क्रमांक पोलीस आयुक्तालयातील अमलदारांनी पटकावले. प्रशिक्षण विद्यालयाच्या वतीने त्यांचा सन्मान करण्यात आला.
दिवसेंदिवस तंत्रज्ञानामध्ये बदल होत आहे. अत्याधुनिक स्वरूपाची साधने उपलब्ध होत आहे. या पार्श्वभूमीवर पोलीस खात्यातील प्रत्येक अंमलदार गुन्हे अन्वेषणामध्ये अपडेट असणे आवश्यक आहे. संबंधित पोलीस कर्मचाऱ्यांना कायद्याबरोबरच तांत्रिक तपासाची ही इत्यंभुत माहिती असणे गरजेचे आहे. या पार्श्वभूमीवर नाशिक येथील गुन्हे अन्वेषण प्रशिक्षण विद्यालयात दहा वर्षापेक्षा जास्त सेवा बजावलेल्या अंमलदारांना प्रशिक्षण दिले जाते. 6 ते 18 मार्च या कालावधीत अशा प्रकारची कार्यशाळा संपन्न झाली
यामध्ये संपूर्ण महाराष्ट्रातील निवडक अमलदारांना या ठिकाणी पाठवण्यात आले होते. नवी मुंबईतून पोलीस आयुक्तालयातून सुद्धा या प्रशिक्षणाला पोलीस कर्मचारी गेले होते. यशस्वी प्रशिक्षण पूर्ण केलेल्या या अंमलदारांनी यावेळी घेण्यात आलेल्या लेखी परीक्षेमध्ये बाजी मारली. समाजसेवा शाखेमध्ये कर्तव्यावर असणाऱ्या सविता म्हात्रे यांनी प्रथम क्रमांक पटकावला. तर पनवेल शहर पोलीस ठाण्यातील अल्पेश पाटील आणि खांदेश्वर येथे नेमणुकीस असलेल्या चेतन घोरपडे यांनी अनुक्रमे द्वितीय व तृतीय क्रमांक पटकावला. प्रशिक्षण विद्यालयाचे प्राचार्य अशोक नखाते, उपप्राचार्य जॉर्ज फर्नांडिस आणि सत्र संचालक राजेंद्र उशिरे यांच्या हस्ते गुणवंत अमलदारांना सन्मानित करण्यात आले.
चौकट - वाहतूक नियमानामध्येही नवी मुंबईत पहिले!
गुन्हे अन्वेषणाबरोबरच वाहतूक व्यवस्थापनाचेही या कालावधीमध्ये प्रशिक्षण संपन्न झाले. नवी मुंबई पोलिस दलातून अंमलदारांना प्रशिक्षणासाठी पाठवण्यात आले होते. यावेळी घेण्यात आलेल्या लेखी परीक्षेत वाहतूक शाखेचे चंद्रशेखर प्रकाशराव वाघ यांनी प्रथम क्रमांक मिळवून नवी मुंबई पोलिसांची मान उंचवली.
Tags
पनवेल