पनवेल दि.१५ (वार्ताहर) : पावसाने अद्याप दमदार सुरुवात केली नसली तरी छत्री आणि रेनकोटची खरेदी करण्यासाठी नागरिकांची पावले पनवेलमधील बाजारपेठांकडे वळू लागली आहेत.
चिनी छत्र्यांवर घातलेली बंदी, भारतीय बनावटीच्या छत्र्यांच्या मागणीत होत असलेली वाढ आणि बाजारातील उपलब्ध छत्री, रेनकोट आदी विविध कारणांमुळे किमतींवर परिणाम झाला आहे. यामुळे गतवर्षीच्या तुलनेत यंदा छत्री, रेनकोटच्या किमतीत १० १२ टक्क्यांनी वाढ झाली असून ग्राहकांना छत्री, रेनकोटसाठी अधिक पैसे मोजावे लागत आहेत.
गतवर्षी नियमितपणे शाळा, महाविद्यालये, कार्यालये सुरू झाली. यामुळे गतवर्षी पावसाळा सुरू होण्यापूर्वी छत्री, रेनकोटचा मोठ्या प्रमाणावर खप झाला होता. यंदाही छत्री आणि रेनकोटला मोठ्या प्रमाणात मागणी असल्याचे व्यापाऱ्यांनी सांगितले. याआधी बाजारात चीनी छत्री, रेनकोटला मागणी होती. मात्र करोनानंतर या वस्तूंच्या मागणीत घट झाली आहे. नागरिक भारतीय बनावटीच्या वस्तूंना प्राधान्य देत असल्याचे निदर्शनास येत आहे.
Tags
पनवेल